Amdanom Ni

Dechreuodd y cyfan fel hobi rhwng dau ffrind, gyda blynyddoedd o brofiad mewn chwaraeon a threfnu digwyddiadau, ond cyn hir fe dyfodd yn rhywbeth llawer mwy. Wedi’u hysbrydoli gan y brwdfrydedd yn eu cymuned eu hunain, lansiodd Tim Lloyd a Nigel ‘Kenny’ Kendrick Always Aim High Events yn 2011 gyda Thriathlonau Slateman a Sandman: un ym mhentref cartref Tim, Llanberis, a’r llall yng nghartref Kenny, Niwbwrch.

Ar ôl teithio’r byd gyda thîm Saab Salomon a chael profiad o ddigwyddiadau arbennig iawn dramor, roedd Tim a Kenny’n teimlo nad oedd dim byd tebyg iawn yma yn y DU. Roedd pobl yn dal i ofyn iddyn nhw “drefnu rhywbeth gwahanol”, ac yn y diwedd fe benderfynon nhw fentro. Fe aethon nhw amdani.

O’r diwrnod cyntaf, roedd ein hegwyddorion yn syml ac yn glir. Byddai ein digwyddiadau’n cael eu llywio gan ein cwsmeriaid. Bydden nhw’n cefnogi busnesau lleol drwy brynu’n lleol, yn arddangos tirweddau godidog Gogledd Cymru, ac yn rhoi rhywbeth yn ôl yn uniongyrchol i’r cymunedau sy’n ein croesawu. Hyd yma, mae mwy na £260,000 wedi’i roi i elusennau a grwpiau lleol o ganlyniad uniongyrchol i’n digwyddiadau. Y gwerthoedd yma luniodd ein penderfyniadau o’r cychwyn cyntaf, ac maen nhw’n dal i fod wrth wraidd popeth rydyn ni’n ei wneud.

Dros y 15 mlynedd diwethaf, rydyn ni wedi creu cannoedd o ddigwyddiadau sydd wedi cael eu mwynhau gan gannoedd o filoedd o gyfranogwyr. Rydyn ni wedi mentro, rhoi cynnig ar syniadau newydd, creu rasys newydd, a meithrin tîm clos sy’n rhannu ein brwdfrydedd a’n hymrwymiad. Er ein bod ni wedi tyfu, rydyn ni wastad wedi aros yn driw i’r pethau sy’n bwysicaf: gwrando ar ein cymuned, ymateb i’n cyfranogwyr, a chynnal rasys bach, unigryw a hardd yng nghanol Gogledd Cymru.

Yn 2025, gwnaeth Tim a Kenny, fel sylfaenwyr y cwmni, y penderfyniad i ymddeol, a daeth Always Aim High Events yn rhan o deulu Run 4 Wales. Mae’r newid yma’n helpu i sicrhau dyfodol hirdymor y digwyddiadau rydyn ni’n eu caru, gan gadw’r cwmni wedi’i wreiddio’n gadarn yng Nghymru. Fel sefydliad nid-er-elw, rydyn ni’n parhau i weithio gyda’r un ethos cymunedol ag oedd gennym o’r cychwyn cyntaf: diogelu swyddi lleol, cefnogi’r economi ranbarthol, a chreu profiadau bythgofiadwy yn y llefydd godidog rydyn ni’n falch o’u galw’n gartref.

Pwy a ŵyr beth sydd gan y dyfodol i’w gynnig? Mae’n siŵr y bydd ambell rwystr ar hyd y ffordd, gobeithio dim byd mor fawr â phandemig byd-eang, ond gyda’n tîm, ein ffrindiau yn Run 4 Wales, a chymuned anhygoel Always Aim High wrth ein hochr, mae’r dyfodol yn edrych yn gyffrous, yn wahanol ac, fel erioed, yn hardd.

Welwn ni chi ar y llinell gychwyn!